កំពង់ស្ពឺ៖ តំណាងរាស្ត្រខេត្តកំពង់ស្ពឺ លោក ហ៊ុន ម៉ានី បានអញ្ជើញទៅសួរសុខទុក្ខកម្មករ កម្មការិនីរោងចក្រដែលបានជួបគ្រោះថ្នាក់ចរាចរណ៍ដោយសារក្រឡាប់ផ្ញាររថយន្តកាលពីព្រឹកថ្ងៃទី០៥ ខែសីហា ឆ្នាំ២០២៣ ស្ថិតក្នុងភូមិទ្រា ឃុំព្នាយ ស្រុកសំរោង ខេត្តកំពង់ស្ពឺ។

លោក ហ៊ុន ម៉ានី មានការសោកស្តាយក្រោយពីទទួលបានដំណឹងពីគ្រោះថ្នាក់ចរាចរណ៍ដែលកើតឡើងលើកម្មករកម្មការិនីរោងចក្របណ្តាលឱ្យរងរបួសធ្ងន់ស្រាលចំនួន ៥១នាក់។

លោកបានសរសេរនៅក្នុងហ្វេសប៊ុកដូច្នេះថា៖ «ខ្ញុំសូមចូលរួមសោកស្តាយចំពោះការរងគ្រោះ និងខាតបង់ទ្រព្យសម្បត្តិរបស់បងប្អូន និងសូមជូនពរឱ្យជនរងគ្រោះទាំងអស់ឆាប់បានជាសះស្បើយ»។

ជាមួយគ្នានេះ លោកអរគុណដល់អាជ្ញាធរខេត្ត មន្ទីរអង្គភាពពាក់ព័ន្ធ លោកគ្រូពេទ្យ អ្នកគ្រូពេទ្យទាំងអស់ដែលបានផ្តល់ការយកចិត្តទុកដាក់ជួយសង្រ្គោះអាយុជីវិតកម្មករកម្មការិនី និងប្រជាពលរដ្ឋទាំងអស់គ្នា។ លោកអំពាវនាវដល់ពលរដ្ឋទាំងអស់ ជាពិសេសអ្នកបើកបរមេត្តាបង្កើនការប្រុងប្រយ័ត្នចំពោះសុវត្ថិភាពអ្នករួមដំណើរ។

លោកថ្លែងថា៖ «យើងពិតជាមិនចង់ឃើញគ្រោះអកុសលណាមួយកើតឡើងទេ តែគ្រប់ពេលដែលបងប្អូនជួបប្រទះបញ្ហា ក្រុមការងារទាំងអស់តែងតែខ្នះខ្នែងដើម្បីជួយដល់បងប្អូនគ្រប់ពេលវេលា។ នេះហើយជាបេះដូងរបស់អ្នកបម្រើប្រជាជន»។

គូសបញ្ជាក់ថា ក្រោយមានករណីគ្រោះថ្នាក់ចរាចរណ៍នេះ អ្នកបើកបរបានរត់គេចខ្លួន ខណៈបច្ចុប្បន្នអាជ្ញាធរកំពុងស្រាវជ្រាវបុគ្គលនោះដើម្បីមកទទួលខុសត្រូវចំពោះហេតុការណ៍ដែលកើតឡើងនេះ៕